Компанијата dm drogerie markt, во соработка со Здружението на граѓани Матрона, организира бесплатна едукативна и интерактивна обука на тема „Правилна исхрана кај деца во најрана возраст и важноста на оралната хигиена кај трудници и деца“.

Настанот ќе се одржи на 17 јуни од 17:30 до 19:30 часот, во „Јавна соба“ во Скопје (ул. 50 Дивизија 22). Местата се ограничени, а заинтересираните учесници треба да се пријават на info@matrona.org.

Предавањата ќе ги одржат прим. д-р Марина Поп Лазарова, неонатолог, и спец. д-р Бојан Ангеловски, стоматолог. Тие ќе се осврнат на клучни теми поврзани со правилната исхрана кај децата, формирањето здрави навики во раното детство и значењето на редовната орална хигиена кај трудници и деца.

Преку интерактивен формат, учесниците ќе имаат можност за директна комуникација со стручните лица и добивање практични совети за секојдневната грижа за здравјето на мајката и детето.

Оваа едукативна средба е дел од „Караванот на мајчинство“, иницијатива која dm и Матрона ја реализираат втора година по ред, со цел да обезбедат поддршка и едукација за семејствата во различни фази од родителството.