Грција официјално побара објаснување од Украина откако во близина на туристичкиот остров Лефкада беше пронајдено беспилотно пловило натоварено со експлозив, за кое грчките власти се сомневаат дека е поврзано со украински сили. Инцидентот предизвика дипломатска реакција од Атина и ја отвори темата за можните безбедносни ризици што војната во Украина би можела да ги пренесе и во Медитеранот.
Според информациите што ги објави „Европска правда“, повикувајќи се на грчкиот весник „Катимерини“, грчкото Министерство за надворешни работи испратило официјален дипломатски протест до Киев. Портпаролката на министерството, Лана Зочиу, потврди дека случајот е покренат и на ниво на Европската Унија. Грчкиот министер за надворешни работи Јоргос Герапетритис за инцидентот ги информирал високата претставничка на ЕУ за надворешна политика и безбедност Каја Калас, како и украинскиот министер за надворешни работи Андриј Сибиха.
Според грчките власти, истрагата спроведена од надлежните служби укажала дека пронајдениот дрон бил поврзан со Украина. Поради тоа, Атина испратила протестна нота и побарала дополнителни информации и објаснувања за околностите под кои пловилото завршило во грчките територијални води.
Грчките медиуми наведуваат дека дронот први го забележале локални рибари во близина на Лефкада. Според првичните информации, станува збор за морски дрон кој ја изгубил врската со својот контролен систем и завршил во близина на островот. Властите во Атина сметаат дека пловилото можеби било дел од поширока операција насочена кон бродови поврзани со руски интереси, иако засега нема официјално објавени детали за неговата наводна мисија.
Дополнителна загриженост предизвикаа информациите во дел од медиумите дека станува збор за моделот „Козак Мамаи“, како и тврдењата дека во него имало околу 100 килограми експлозив. Сепак, овие наводи сè уште не се независно потврдени.
Лефкада е една од најпосетуваните туристички дестинации во Грција, позната по своите плажи и летни одморалишта, поради што инцидентот предизвика дополнително внимание во јавноста. Грчките власти нагласуваат дека не сакаат безбедносните ризици поврзани со војната во Украина да се прелеат во медитеранскиот регион. Министерот за одбрана Никос Дендиас уште во мај предупреди за сериозноста на случајот и порача дека очекува појаснувања од украинската страна.
Од Киев, пак, ги отфрлаат обвинувањата. Украинското Министерство за надворешни работи соопшти дека во моментов нема цврсти докази кои недвосмислено би покажале дека пронајдениот дрон им припаѓал на украинските сили и ги оспори тврдењата за неговото потекло.
