Американскиот претседател Доналд Трамп изјави дека Иран направил „сериозно прекршување“ на примирјето, но нагласи дека и покрај тоа сè уште верува во можноста за постигнување мировен договор. Информацијата ја пренесе новинарот Џонатан Карл од ABC News, кој изјави дека лично разговарал со Трамп.
„Договор ќе има. На овој или на друг начин. На убав начин или на потежок начин – ќе се случи“, изјавил Трамп, без да прецизира што точно го смета за прекршување на примирјето.
Примирјето меѓу САД и Иран стапи на сила на 8 април и треба да трае до 22 април. Сепак, според претседателот на иранскиот парламент Мохамад Багер Галибаф, меѓу двете страни и натаму постојат сериозни разлики. Новите тензии дополнително се зголемија откако Иран повторно го затвори Ормузки теснец – една од најважните светски рути за транспорт на нафта и гас.
Според иранските власти, теснецот ќе остане затворен сè додека САД не ја укинат блокадата на иранските пристаништа.
Овој потег веќе предизвика сериозни нарушувања на глобалниот енергетски пазар, со нагло зголемување на цените и стравувања од недостиг на гориво во повеќе делови од светот. Аналитичарите предупредуваат дека наредните денови ќе бидат клучни – дали кризата ќе се смири преку дипломатски договор или ќе ескалира во нов конфликт.
