Скопскиот стационар на Јавното претпријатие за благосостојба на бездомни животни „Лајка“ денеска реализираше едно од своите најзначајни вдомувања. Тмот на технолошката компанија „Авенга Македонија“ ја вдоми Кремка, куче со хендикеп кое поради својата состојба и физички изглед со месеци имаше минимални шанси да го напушти кафезот. Наместо изолација во бокс, кучето отсега живее во канцелариски простор каде секојдневно добива грижа, прошетки и постојано човечко присуство.

Статистиките на засолништата покажуваат дека животните со телесен хендикеп, постарите кучиња и оние без расно потекло најчесто остануваат со години зад решетките во стационарите. Повеќето граѓани при вдомување избираат млади, здрави или расни кучиња, оставајќи ги поранливите на маргините на системот за грижа.

Тимот на „Авенга Македонија“ свесно го скрши овој стереотип. Од ЈП „Лајка“ соопштија дека вработените погледнале подалеку од предрасудите и намерно ја избрале токму Кремка, препознавајќи ја нејзината нежна природа наместо физичките ограничувања. Кучето со хендикеп, кое имаше најмали изгледи да биде забележано, доби директна поддршка од цела работна заедница.

Кучето Кремка го напушти боксот и веќе е сместено во работните простории на компанијата во Скопје. Таму за нејзините потреби се грижат десетици вработени, организирани во секојдневни дежурства за хранење, прошетки и ветеринарна грижа. Оваа практика на „канцелариски миленик“ со години е стандард во развиените технолошки центри низ Европа, но на домашен терен ретко се применува врз животни со попреченост.

ЈП „Лајка“ изрази благодарност до компанијата, нагласувајќи дека ваквиот чин претставува директна потврда за корпоративна одговорност преточена во дело. За Кремка, оваа одлука значи прекин на долготрајната невидливост и трајно обезбеден дом во средина каде физичкиот недостаток не претставува пречка за достоинствен живот.