Македонија денес ќе биде под влијание на стабилно, сончево и многу топло време, со мала до умерена облачност. Според прогнозата на УХМР, дневната температура ќе достигне до 40 степени, а во поголемиот дел од земјата ќе дува слаб до умерен ветер од променлив правец.

Во попладневните часови, особено во планинските предели и во северните делови од државата, можно е локално да се развие нестабилност проследена со пороен дожд, грмежи и засилен ветер, а на одделни места не е исклучена ниту појава на град.

Во Скопје времето ќе биде претежно сончево и многу топло. Максималната температура ќе се искачи до околу 39 степени, а попладне во делови од котлината ќе има услови за краткотраен дожд и грмежи.

Надлежните препорачуваат граѓаните да избегнуваат подолг престој на отворено во периодот од 11 до 17 часот, да внесуваат повеќе течности и да внимаваат на најранливите категории – постарите лица, хронично болните и малите деца. Очекувањата се високите температури да продолжат и во следните денови.