Британски воен медицински тим со падобрани се спуштил на островот Тристан да Куња во јужниот Атлантски Океан, за да му пружи итна помош на локален жител за кого постои сомнеж дека е заразен со хантавирус. Пациентот претходно бил патник на крузерот „МВ Хондиус“, каде беше регистрирано жариште на вирусот што досега предизвика неколку смртни случаи.
Операцијата била организирана бидејќи островот има исклучително ограничени медицински капацитети и нема аеродромска писта. На Тристан да Куња живеат само околу 220 жители, а пристапот е можен единствено по морски пат. Поради критично ниските резерви на кислород и влошената здравствена состојба на пациентот, британските власти решиле да испратат шест падобранци и двајца лекари специјалисти за интензивна нега.
Според британското Министерство за одбрана, ова е првпат во историјата медицински тим да биде спуштен со падобрани во рамки на хуманитарна мисија. Операцијата се одвивала во тешки временски услови, со силен ветер и ограничена видливост, а војниците патувале повеќе од 10.000 километри за да стигнат до островот.
Во меѓувреме, здравствените власти продолжуваат да ја следат состојбата со хантавирусот поврзан со крузерот „МВ Хондиус“. Светската здравствена организација досега потврди повеќе случаи на зараза, а патниците од бродот се ставени под медицински надзор и карантин во неколку земји. Иако експертите уверуваат дека ризикот од глобално ширење е низок, случајот предизвика големо внимание бидејќи станува збор за редок сој на вирус кој во одредени ситуации може да се пренесува и меѓу луѓе.
