Велика Британија ќе ѝ исплати до 660 милиони фунти на Франција во рамки на нов тригодишен договор за зајакнување на граничната безбедност и намалување на илегалната миграција преку Ла Манш.
Според договорот, најголемиот дел од средствата, околу 500 милиони фунти ќе бидат наменети за засилување на контролите на северното француско крајбрежје. Ова вклучува распоредување на околу 1100 припадници на полицијата, разузнавачките служби и војската.
Дополнителни 160 милиони фунти ќе бидат исплатени само доколку мерките дадат резултати. Во спротивно, финансирањето може да биде прекинато по една година. Договорот доаѓа во услови на континуиран притисок од миграциските рути, откако во 2025 година повеќе од 41.000 луѓе го преминале каналот со мали чамци бројка блиску до рекордот од 2022 година.
Нови мерки: дронови, хеликоптери и морски патроли
Соработката меѓу двете земји ќе вклучува формирање на нова специјална полициска единица, проширување на разузнавачките и истражните тимови, како и засилени морски патроли.
Во надзорот ќе се користат дронови и два хеликоптера, додека Франција ќе ангажира и нов брод и повеќе од 20 дополнителни морски службеници за пресретнување на пловила. Од британската влада велат дека заедничките операции досега спречиле повеќе од 42.000 обиди за нелегално преминување, откако владата на Кир Стармер ја презеде власта во јули 2024 година.
Новиот договор го заменува претходниот тригодишен аранжман вреден околу 480 милиони фунти, кој истече претходно оваа година, и претставува засилен обид за справување со еден од најголемите политички и безбедносни предизвици во регионот.
