Brent нафтата денес пробила 108 долари за барел, раст од 2,6 отсто за еден ден. Проблемот не е само до авионскиот билет за летување туку до храната, превозот, струјата… Живеењето ќе стане поскапо, а и потешко.
Brent на 108 долари е рекорд за оваа година
Цената на Brent нафтата денес достигна 108,02 долари за барел, раст од 2,6 отсто, додека американскиот WTI е на 96,66 долари, исто така во пораст. Последен пат вакви цени беа забележани во периодот на острата енергетска криза. Аналитичарите го поврзуваат порастот со напнатата геополитичка ситуација на Блискиот Исток и намалената производна квота на ОПЕК.
Пумпите во Македонија веќе реагираа
Регулаторната комисија за енергетика ги усогласува цените на горивата со движењата на берзата. Дизелот моментално е на 94 денари, бензинот на 80,5 денари. Порастот на Brent директно се пресликува на домашните цени со одреден временски застој, што значи дека следниот регулаторен циклус може да донесе дополнително поскапување.
Горивото не е само за автомобили
Нафтата е суровина вградена во речиси секоја цена. Транспортот на стоки, вештачките ѓубрива, производството на пластика, греењето, па и цената на прехранбените производи се директно поврзани со движењата на берзата. Македонија увезува над 90 отсто од своите енергетски потреби, што ја прави особено изложена на вакви пазарни шокови.
Медиумите пишуваат за летови, пазарот прави друго
Додека уредниците избираат фотографии од плажи и пресметуваат каде е најевтин директен лет до море, нафтениот пазар испраќа поинаква порака. Граѓанинот кој никогаш не летал, кој го полни резервоарот и ја плаќа сметката за парно, е всушност на првата линија на оваа криза, а не патникот на нискобуџетен лет.
