Министерството за образование и наука најави засилени безбедносни мерки и поголем надзор во училиштата, како одговор на неодамнешниот случај на врсничко насилство во Ѓорче Петров.
Министерката за образование, Весна Јаневска, информираше дека веќе се испратени дописи до сите градоначалници и училишта. Според најавата, наместо ученици, во ходниците и дворовите ќе мора да дежураат наставници.
Целта на оваа мерка е наставниот кадар навремено да забележува и спречува евентуални инциденти меѓу учениците.
„Тоа што се случило надвор од училиштето не е оправдување. Тоа се ученици на одредено училиште и наставниците мора да имаат увид во тоа како се однесуваат нивните ученици, затоа што тоа е воспитно-образовен процес“, изјави Јаневска.
Дополнително, дежурните наставници ќе мора да бидат на видно место, за Државниот просветен инспекторат полесно да врши контроли и да го констатира нивното присуство.
Мерките доаѓаат во период на зголемена јавна загриженост за безбедноста во училиштата и потребата од поефикасен надзор, превенција и навремена реакција на институциите.
