Автомобилската индустрија влегува во период на големи промени, а водечките производители постепено укинуваат дел од своите најпознати модели. Audi, BMW, Volkswagen и Hyundai веќе најавија дека до 2026 година ќе прекинат со производство на неколку автомобили кои со години беа симбол на пристапна мобилност и уживање во возењето.
Причините се зголемените трошоци, построгите еколошки стандарди и забрзаната транзиција кон електрични возила.
Audi се повлекува од сегментот на мали автомобили
Германскиот производител ќе ги укине моделите Audi A1 и Audi Q2. Продажбата на A1 значително опаднала во последните години, а компанијата смета дека профитните маржи во овој сегмент се премногу ниски за премиум бренд. Воедно, постепено ќе биде укинат и Q2, од кој досега се произведени речиси 890.000 примероци.
И Hyundai ќе го прекине производството на Hyundai i10 во 2026 година. Овој модел долго време важеше за еден од најприфатливите градски автомобили во Европа. Неговиот електричен наследник, Hyundai Inster, ќе биде значително поскап. Додека i10 чинеше околу 15.000 евра, цената на Inster ќе стартува од околу 24.000 евра.
Со тоа постепено завршува ерата на евтините мали автомобили со мотори со внатрешно согорување.
BMW ја затвора приказната за родстерите
BMW ќе престане со производство на BMW Z4, со што ќе заврши ерата на двоседите со отворен покрив во понудата на брендот. Моделот се произведуваше во Graz од 2018 година, а досега се произведени повеќе од 55.000 примероци.
Бидејќи Z4 ја дели платформата со Toyota GR Supra, и тој модел постепено ќе биде повлечен во сегашната форма. Toyota веќе најави дека името Supra ќе продолжи да постои како електричен модел.
Volkswagen ќе го прекине производството на Volkswagen T-Roc Cabriolet, последниот кабриолет во гамата на компанијата. Продажбата била далеку под очекувањата, а оваа одлука може да значи и затворање на фабриката во Osnabrück, која со децении произведува кабриолети.
Купувачите ќе имаат сè помал избор на поевтини автомобили, особено во сегментот на мали градски модели и кабриолети. Производителите сè повеќе се фокусираат на електрични возила и поскапи модели со поголема заработка. Тоа значи дека класичните компактни автомобили и автомобилите со отворен покрив постепено ќе стануваат реткост на европските патишта .
