Австралиската музичка индустрија воведува нови правила со кои целосно или претежно генерираните песни со вештачка интелигенција нема да можат да се најдат на официјалните музички топ-листи. Австралиската асоцијација на музичката индустрија (ARIA) одлучи песните што конкурираат за пласман на листите да бидат „во значителна мера создадени од луѓе“. Правилото сепак не забранува употреба на AI како алатка во музичкиот процес.
Според новите правила, луѓето мора да ја напишат песната и да ги изведат главниот вокал и примарните инструменти, додека употребата на AI за мастеринг останува дозволена. Одлуката доаѓа откако песна на австралискиот диџеј Џош Фаваз, AI-асистирана преработка на „Like a Prayer“ од Мадона, стигна до првото место на ARIA денс-листата и до второто место на вкупната листа. Песната досега има повеќе од 48 милиони слушања на Spotify.
Од ARIA велат дека целта е да се зачува „човечката природа на уметноста“, особено во време кога AI-музиката масовно се појавува на стриминг-платформите.
Речиси 40 отсто од новата музика користи AI
Одлуката на Австралија доаѓа во момент кога вештачката интелигенција сè повеќе го менува музичкиот пазар. Според ново истражување на SubmitHub, во јули 2026 година речиси 40 отсто од новообјавената музика во светот вклучувала AI. Анализирани биле повеќе од еден милион песни. Од нив, 23,2 отсто биле целосно генерирани со AI, а15,3 отсто содржеле AI-генериран аудио материјал кој потоа бил изменет или обработен од луѓе.
Ова отвора сè поголема дилема за музичката индустрија, дали публиката треба да знае кога слуша музика создадена со помош на AI и дали таквата музика треба да се натпреварува рамноправно со музиката создадена од луѓе.
Spotify подготвува посебна ознака за AI-музиката
Проблемот веќе не е само прашање на топ-листите. Spotify најави дека од септември ќе започне да додава „AI Persona“ ознака на одредени профили, за слушателите полесно да препознаат музика создадена со употреба на вештачка интелигенција.
Платформата исто така најави дека AI Personas ќе бидат исклучени од нејзините уреднички и алгоритамски препораки. Минатата година Spotify објави дека за 12 месеци отстранил 75 милиони спам-песни, при што ширењето на AI-алатките дополнително го зголеми проблемот со масовно производство на неквалитетна и потенцијално измамничка музика.
AI-проект веќе стигна до врвот на американска листа
Колку брзо AI-музиката може да стигне до масовната публика покажа и проектот Breaking Rust, кој минатата година се искачи на првото место на Billboard Country Digital Song Sales листата со песната „Walk My Walk“. Случајот со The Velvet Sundown, пак, покажа колку лесно може да се создаде целосно измислен музички идентитет – со имиња, фотографии, биографии и музика генерирани со помош на AI.
Австралија сега испраќа јасна порака: AI може да биде алатка за музичарите, но песна создадена речиси целосно од машина нема да се третира исто како музика во која клучната креативна улога ја има човекот.
