Селекторот на Аргентина, Лионел Скалони, остро го критикуваше распоредот на Светското првенство 2026 по исцрпувачката победа над Зеленортските Острови по продолженија. Аргентина славеше со 3:2 по 120 минути игра, а веќе во вторник ја очекува осминафиналниот натпревар против Египет, што значи дека актуелниот светски шампион има само три и пол дена за опоравување.

„Што следува сега? Одмор. Не знам како е осмислено ова Светско првенство. Имавме шест дена пауза, а сега само три и пол. Токму кога одморот најмногу ти е потребен, го имаш најмалку. Тоа е многу тешко да се разбере“, изјави Скалони.

Повреди и замор во аргентинскиот тим

Дополнителен проблем за аргентинскиот селектор се и неколкуте повреди и грчеви што ги заработија неговите играчи во драматичниот натпревар во Мајами. Факундо Медина беше заменет поради силни грчеви, а слични проблеми имаше и Енцо Фернандес, кој сепак го заврши натпреварот бидејќи тимот веќе немаше право на измени. Покрај тоа, Нико Гонзалес го повреди зглобот во продолженијата, што дополнително ги зголеми грижите на стручниот штаб.

„Енцо почувствува помал грч, но успеа да го доигра мечот. Факундо беше многу изморен бидејќи имаше голема потрошувачка. За среќа, на клупата го имаме Николас Таљафико, кој ни дава сигурност“, рече Скалони.

Следува Египет

Аргентина сега патува во Атланта, каде ќе се соочи со Египет, кој со голема самодоверба влегува во натпреварот откако ја елиминира Австралија по изведување пенали.

Египќаните привлекоа внимание и со необичната подготовка за пенал-серијата – непосредно пред изведувањето на ударите, играчите анализирале снимки од противничките пеналџии на лаптоп, што им помогнало да стигнат до пласман во осминафиналето.