Две третини од граѓаните на Европската унија би поддржале враќање на Обединетото Кралство во ЕУ, додека мнозинството британски гласачи сметаат дека Brexit бил грешка и дека земјата треба да има поблиски односи со Унијата, вклучително и дел од интеграцијата како слободно движење. Тоа го покажува ново истражување објавено десет години по референдумот за излез на Велика Британија од ЕУ.

Анкетата, спроведена од Европскиот совет за надворешни односи, покажува дека 66% од испитаниците во 15 европски земји го оценуваат членството на Велика Британија во ЕУ како добра или барем прифатлива идеја. Поддршката за повторно приклучување е висока во повеќе земји, вклучувајќи ја и Холандија и Данска, каде што достигнува 75%.

Дури и гласачи на десничарски и евроскептични партии изразуваат поддршка за поблиски односи меѓу Велика Британија и ЕУ, вклучително и дел од поддржувачите на AfD во Германија и Националниот собир во Франција. Истовремено, повеќе европски лидери отворено сигнализираат дека врата за Велика Британија не е затворена. Францускиот претседател Емануел Макрон порача дека ЕУ секогаш е отворена, а шпанскиот премиер Педро Санчез изјави дека Шпанија би поддржала повторно членство. Финскиот претседател Александар Стуб исто така нагласи дека Европа има потреба од британскиот глас.

Во самата Велика Британија, анкетата покажува дека дури 75% од испитаниците сакаат поблиски односи со ЕУ. Мнозинството смета дека излегувањето од Унијата негативно влијаело врз трошоците за живот, економијата, можностите за младите, трговијата и миграцијата. Дури и меѓу гласачите кои во 2016 година поддржале Brexit, дел сега признаваат дека состојбата во некои области е влошена. Најчест одговор за „корист од Brexit“ е дека не постои јасна корист или дека ефектите се негативни.

Истражувањето покажува и силна поддршка за поблиска економска соработка со ЕУ, при што значителен дел од граѓаните би прифатиле и слобода на движење во замена за посилни трговски врски. Авторите на извештајот заклучуваат дека европската јавност е отворена за враќање на Велика Британија, додека британското општество значително се оддалечило од ставовите од 2016 година. Анкетата ги дели британските гласачи во три групи: „оптимисти“ кои сакаат усогласување со Европа, „реалисти“ кои балансираат меѓу ЕУ и САД и „изолационисти“ кои ја ставаат сувереноста на прво место.

Генерално, истражувањето покажува и дека Британците сè повеќе ја гледаат Европа како подобар безбедносен партнер од САД, со поддршка за заедничка одбранбена политика и поголема европска автономија.