Со поддршка од Европската Унија, девет студентски домови низ земјата добиваат нова изолација, современо греење, обновена инфраструктура и соларни панели. Целта е студентите да живеат во подобри услови, а домовите да трошат помалку енергија и да станат поефикасни, побезбедни и пофункционални.

Во првата фаза се опфатени скопските студентски домови „Стив Наумов“ и „Кузман Јосифовски Питу“, а програмата продолжува и со други домови во Скопје, Охрид, Штип, Прилеп и Битола

Програмата за енергетска ефикасност во студентските домови не се сведува само на фасади и технички зафати. Таа опфаќа и подобрување на основниот комфор: санитарни услови, електрична инсталација, греење, осветлување, безбедносни системи и простори за учење.

Во таа приказна се вклучува и Анастасија Трајковска, студентка на Факултетот за драмски уметности, која од лично искуство знае што значи студентски дом да биде повеќе од место за спиење.

„Кога си студент, со години живееш во студентски дом и сакаш едноставни работи: да ти е топло, да имаш услови да учиш, да се фокусираш. Но кога тоа го нема, сфаќаш колку е битно“, вели Анастасија.

Подобри услови за живот, учење и фокус

Студентскиот дом е простор во кој младите не само што живеат, туку учат, се подготвуваат, работат на себе и го градат својот пат. Затоа условите во домовите директно влијаат врз секојдневието на студентите.

Кога собите се студени, кога греењето не е доволно, кога просторот не е функционален, студентскиот живот станува потежок. Наместо фокусот да биде на учење, испити, креативност и развој, голем дел од енергијата оди на справување со основни услови.

Токму затоа обновата на домовите е важна. Новата изолација, современото греење и подобрената инфраструктура треба да создадат средина во која студентите ќе можат полесно да се фокусираат на она поради што се таму: образованието.

Енергетска ефикасност што се чувствува во секојдневието

Со поддршка од ЕУ, студентските домови добиваат мерки за енергетска ефикасност што треба да донесат до 40 проценти помалку потрошена енергија. Тоа значи помали загуби на топлина, подобро греење, поефикасно користење на ресурсите и почиста енергија преку соларни панели.

Ова е важно не само за институциите, туку и за студентите. Енергетската ефикасност не е далечен технички поим кога значи потопла соба, подобро осветлување, постабилни услови и дом во кој може нормално да се живее и учи.

Програмата покажува дека зелената транзиција може да почне токму од местата каде младите го поминуваат секојдневието. Од студентските соби, училниците, ходниците и просториите за учење.

Повеќе енергија за студентите, помалку загубена енергија за домовите

„Денес, тоа се менува. Со поддршка од ЕУ, девет студентски домови добиваат нова изолација, современо греење и соларни панели. До 40% помалку потрошена енергија. Подобри услови за нас, повеќе енергија за сите“, вели Анастасија.

Нејзината порака ја носи суштината на оваа промена. Кога студентите имаат подобри услови, тие имаат и повеќе простор да учат, да создаваат, да се фокусираат и да растат.

Планот за раст на Европската Унија ја поддржува токму таа идеја: јавните објекти да станат поефикасни, студентските домови подобри за живеење, а младите да добијат услови што им овозможуваат да го вложат своето време и енергија таму каде што е најважно – на секој нивни следен чекор