„Амазон“ планира во 2027 година да инвестира повеќе од 16 милијарди евра во Германија за да ги прошири активностите во областа на облачните услуги, вештачката интелигенција, сателитскиот интернет и медиумите.

Инвестицијата е дел од поширокото проширување на инфраструктурата за облачни услуги низ Европа, поттикнато од наглиот раст на побарувачката за услуги засновани на вештачка интелигенција и засилената конкуренција меѓу технолошките компании.

Планот беше најавен на самитот „Инвестирај во Германија“ во Берлин и се надоврзува на повеќе од 100 милијарди евра што „Амазон“, според објавените информации, ги инвестирал во Германија од 2010 година.

Од планираните средства, 4,8 милијарди евра се наменети за проширување на облачниот регион на „Амазон веб сервисис“ (AWS) во Франкфурт и за инфраструктура поврзана со вештачката интелигенција.

Инвестициите ќе опфатат и нови логистички проекти, за кои се очекува да отворат повеќе од 3.000 работни места. Во планот се вклучени и развојот на сателитската широкопојасна мрежа „Амазон Лео“, како и нови продукции за стриминг-платформата „Прајм видео“.

Компанијата планира и отворање втор истражувачки лабораториски центар во Берлин, посветен на роботиката и вештачката интелигенција.

Пред две години, „Амазон“ најави инвестиција од 10 милијарди евра за проширување на облачната инфраструктура и логистичката мрежа во Германија. Од таа сума, 8,8 милијарди евра беа наменети за центрите за податоци на „Амазон веб сервисис“.

Новата инвестиција доаѓа во период кога технолошките компании забрзано ги прошируваат капацитетите за обработка и складирање податоци, неопходни за развојот и примената на вештачката интелигенција. Паралелно, расте и конкуренцијата за инфраструктура, корисници и деловни партнери на европскиот пазар.