До 13:00 часот денеска, на територијата на Македонија се регистрирани вкупно девет пожари на отворен простор, од кои два сè уште се активни, еден е ставен под контрола, а шест се целосно изгаснати, соопшти Центарот за управување со кризи (ЦУК).
Активни се пожарите во Општина Старо Нагоричане, над ресторанот „Баба Цана“, каде гори ниска вегетација и стрниште, како и во Општина Свети Николе, помеѓу селата Црнилиште и Сарамзалино, покрај патот Велес–Штип, каде се зафатени ниска вегетација, сува трева и лозје.
Под контрола е пожарот во Општина Македонски Брод, во атарот на селото Белица, каде гореле ниска вегетација, сува трева и лисна постилка.
Во меѓувреме, целосно се изгаснати шест пожари:
- во Струмица, на улицата „Климент Охридски“ бр. 105;
- на две локации во Валандово – на улицата „Каме Полизов“, зад „ДИМ Комерц“, и во селото Честово;
- во Пехчево, во месноста Чифлик кон селото Умлена;
- во Прилеп, кај Новите градски гробишта;
- и во Куманово, во населбата Банова Трла, каде горело ѓубре.
Од ЦУК апелираат до граѓаните да бидат внимателни при движење и престој на отворено и да избегнуваат активности што можат да предизвикаат пожар, особено поради високите температури и сувото време.
