Европа влегува во зимската сезона со сериозен социјален проблем: десетици милиони граѓани немаат доволно средства за соодветно загревање на своите домови. Енергетската сиромаштија повторно станува едно од клучните прашања за европските влади.

Според европскиот комесар за енергетика Дан Јоргенсен, речиси 50 милиони Европејци веќе се соочуваат со тешкотии при обезбедувањето соодветно греење.

На состанокот на министрите за енергетика на ЕУ, одржан на 29 октомври, Јоргенсен предупредил дека зимата ќе биде тешка за многу домаќинства поради високите цени на енергенсите.

Иако Европската Унија не очекува непосреден физички недостиг од енергија, проблемот е во нејзината достапност за граѓаните.

Енергетската сиромаштија станува европски предизвик

Европските земји се соочуваат со зголемени цени на нафтата, гасот и горивата, во услови на геополитички тензии и нарушувања во снабдувањето.

Според Ројтерс, европските складишта за природен гас кон крајот на октомври биле пополнети околу 75 проценти, во споредба со 83 проценти една година претходно.

Европската Унија троши околу 18 проценти помалку гас отколку во периодот пред енергетската криза од 2022 година, но ценовните притисоци и натаму претставуваат проблем за домаќинствата и индустријата.

Јоргенсен побарал државите членки да воведуваат привремени и таргетирани мерки за заштита на најранливите граѓани.

Воедно, Европската Унија го воспостави Социјалниот климатски фонд, преку кој за периодот од 2026 до 2032 година се предвидени 86,7 милијарди евра, вклучувајќи национални придонеси.

Средствата се наменети за поддршка на ранливите домаќинства и малите бизниси, подобрување на енергетската ефикасност на домовите и пристап до почисти извори на енергија и транспорт.

Европската енергетска криза покажува дека стабилното снабдување не е доволно ако граѓаните не можат да ги платат сметките.

За милиони домаќинства, најважното прашање оваа зима нема да биде дали има доволно енергија, туку дали можат да си дозволат да ја користат.