Иако датумите на пакувањата како „sell by“, „use by“ и „best if used by“ не секогаш значат дека храната веднаш е расипана, постојат одредени намирници кои по истек на рокот не треба да се консумираат поради висок ризик од труење. Експертите предупредуваат дека изгледот и мирисот не се секогаш сигурен показател за безбедноста на храната, па затоа треба да се биде внимателен.

Меѓу најризичните намирници се замени за јајца кои по отворање треба да се употребат во рок од 3–5 дена, како и меките сирења како рикота и крем сир кои брзо се расипуваат. Различните сосови и намази, иако траат подолго по отворање (мајонез до два месеци, кечап до шест месеци, сенф до една година), сепак можат да станат небезбедни ако се забележат промени во мирис, боја или текстура.

Голем ризик носат и салатите на база на компири, јајца или тестенини, кои треба да се фрлат по 3–5 дена, како и свежо цедени непастеризирани сокови кои мора да се консумираат многу брзо. Свежото месо треба веднаш да се подготви или замрзне, додека меленото месо е особено ризично и не треба да стои повеќе од два дена во фрижидер.

Деликатесните сувомеснати производи, како и рибата, имаат уште пократок рок по отворање и можат брзо да станат опасни поради развој на бактерии како листерија. Слично важи и за лиснат зеленчук, млечни производи, готови јадења и готови сендвичи и салати, кои се наменети за брза потрошувачка. Стручњаците советуваат дека во случај на дилема секогаш е побезбедно храната да се фрли, бидејќи труењето со храна може да има сериозни последици, додека неколку фрлени намирници се многу помал ризик од здравствени компликации.