Со приближувањето на зимата, возачите повторно ја прават пресметката дали да купат посебен зимски комплет или гуми за сите сезони. Според белградскиот автомеханичар Милан Петровиќ, кој зборува за „Блиц“, изборот зависи од условите на патот и од возачките навики.

Кому му одговараат универзалните гуми?

Целогодишните гуми се практична опција за возачи кои претежно се движат низ град, поминуваат помалку километри и возат во подрачја со поблаги зими. Еден комплет ги намалува трошоците за сезонска промена и за чување на вториот сет.

Сепак, бидејќи се користат цела година, нивното трошење треба редовно да се следи. Големата километража може да ја намали почетната заштеда, пренесува „Блиц“.

Кога предност имаат зимските гуми?

За жителите на планинските места и за возачите кои често патуваат по снег и при многу ниски температури, Петровиќ им дава предност на зимските гуми. Во такви услови, според него, тие обезбедуваат подобро прилепување. На одредени делници е потребна и дополнителна опрема, како синџири.

Што е задолжително во Македонија од 15 ноември?

Во Македонија задолжителното поседување зимска опрема трае од 15 ноември до 15 март. За возилата до 3.500 килограми, МВР предвидува зимски гуми на сите четири тркала со шара од најмалку четири милиметри или летни гуми со истата минимална длабочина и соодветни синџири за погонските тркала. За возилата со погон 4х4 важат посебни услови.