Целта на Москва е да го претвори западниот дел на Црното Море во зона која е апсолутно непогодна за пловидба, предупреди украинскиот претседател Володимир Зеленски. По комбинираниот напад со дронови врз два цивилни брода во бугарската економска зона, тој ја обвини Русија за намерна ескалација и побара јасни узвратни акции од меѓународната заедница.

Во своето обраќање, Зеленски го искористи инцидентот во бугарските води за да ја илустрира пошироката руска стратегија. Според него, потопувањето и оштетувањето на цивилните бродови не се изолирани случаи, туку континуиран обид на Москва да воспостави контрола преку страв во западниот дел на Црното Море.

Тој децидно отфрли каква било вмешаност на украинските одбранбени сили во овој реон. Украинската воена морнарица веќе стапила во контакт со колегите од Бугарија, при што е потврдено дека станува збор за руски напад извршен преку координирано користење на поморски и воздушни дронови.

Соочен со новите ризици за трговските рути, украинскиот државен врв презема конкретни чекори. Зеленски соопшти дека издал директна наредба до вооружените сили, Министерството за одбрана и разузнавачките служби да ја максимизираат интеракцијата со меѓународните партнери.

Примарната цел на оваа соработка е да се изнајдат дополнителни можности за заштита, како на украинските пристаништа кои се под постојан удар, така и на цивилната пловидба во водите на сојузниците.

Украинскиот претседател потсети дека инцидентот кај Бугарија доаѓа непосредно по сличен удар врз брод во романски води. Тој предупреди дека Русите планираат постојано да ја засилуваат ескалацијата, посочувајќи го како дополнителен доказ и редовното навлегување на руски беспилотни летала во воздушниот простор на Молдавија.

Ваквата агресивност, според Зеленски, бара итна реакција. Тој порача дека се неопходни апсолутно јасни одговори на руските постапки кои директно ја загрозуваат безбедноста на црноморскиот слив.