Бројот на затвореници во Европската унија во 2024 година е зголемен за два проценти во споредба со претходната година, покажуваат најновите податоци на Евростат. Во просек, во ЕУ има по еден затвореник на секои 883 жители, а највисоки стапки се регистрирани во Унгарија, Полска, Летонија и Чешка.

Според извештаите, само мал дел од затворениците се жени, додека секој петти затвореник има странско државјанство. Од друга страна, најмал број затвореници на 100 илјади жители имаат Финска, Холандија, Данска и Германија. Хрватска се наоѓа меѓу земјите со повисока стапка на затвореници во рамки на Европската унија.

Во исто време, расте и бројот на полициски и затворски службеници, но проблемот со пренатрупаноста останува сериозен. Во просек, на еден затворски службеник доаѓаат речиси двајца затвореници.

Сѐ поголем број европски држави предупредуваат на лошите услови во затворите. Советот на Европа неодамна ја повика Грција да преземе мерки поради пренатрупаните и нехумани услови во затворските установи. Во извештајот се наведува дека дел од затворите имаат влага, мувла, расипани санитарии и недостиг од топла вода и греење.

Незадоволство има и во Португалија, каде што затвореници протестирале поради нехигиенски услови, додека во Белгија затворскиот персонал организирал национален штрајк поради преголемиот број затвореници и зголеменото насилство. Тамошните затвори работат над својот капацитет, а стотици затвореници спијат на душеци поставени на под.

Податоците покажуваат дека во 2024 година дури 13 земји во ЕУ пријавиле пренатрупани затвори, додека во 14 земји имало слободни капацитети. Најголема пренатрупаност е забележана во Кипар, Словенија и Франција.