Повеќе од 80 отсто од австралиските тинејџери продолжија да користат социјални мрежи три месеци по стапувањето на сила на историската забрана за помлади од 16 години. Извештајот на австралискиот регулатор за интернет безбедност покажува дека технолошките компании не успеаја да воспостават ефикасни механизми за проверка на возраста, со што регулативата остана главно на хартија.

Австралија донесе закон со кој се забранува пристап до социјалните мрежи за лица под 16 години, со цел да се заштитат младите од штетни содржини и дигитална зависност. Сепак, реалните податоци на регулаторот покажуваат дека речиси целата тинејџерска популација наоѓа начини да ги заобиколи пречките или уредите воопшто не бараат потврда за нивниот идентитет.

Основната причина за неуспехот на мерката лежи во самите платформам кои не имплементираа строги дигитални филтри. Технолошките гиганти се соочуваат со критики дека профитот го ставиле пред почитувањето на законските обврски, оставајќи ги профилите на малолетниците активни без соодветна проверка.

Анализата на регулаторот за интернет безбедност наведува дека младите корисници користат едноставни трикови за да ја заобиколат забраната, од внесување лажни датуми на раѓање до користење приватни мрежи. Без задолжително користење на биометриски податоци или официјални лични документи при регистрација, компаниите не можат да ги детектираат малолетните корисници.

Оваа состојба отвора дебата и во други држави кои размислуваат за слични законски чекори. Австралискиот пример покажа дека без соодветни технички стандарди и строги казни за платформите, забраните за возраст не го постигнуваат посакуваниот ефект во дигиталниот простор.