WhatsApp се подготвува за една од најголемите промени од своето постоење. Корисниците наскоро ќе можат да комуницираат без потреба да го откриваат својот телефонски број.

Наместо бројот, соговорниците ќе гледаат единствено корисничко име, односно username.

Новата функција ќе биде достапна за корисниците ширум светот во наредните месеци, соопштија од WhatsApp. Апликацијата веќе почна да им овозможува на корисниците да резервираат уникатни кориснички имиња, кои ќе можат да се користат кога функцијата целосно ќе биде пуштена во употреба подоцна годинава.

Користењето на оваа опција нема да биде задолжително. Корисниците ќе можат да го избришат или променат своето корисничко име во секој момент.

Кога функцијата целосно ќе стане активна, новите контакти ќе можат да се поврзуваат преку размена на кориснички имиња, без потреба од споделување телефонски број. Опциите за блокирање и пријавување несакани пораки ќе останат достапни.

Ограничувања и заштита од лажно претставување

Корисничките имиња ќе бидат ограничени на должина од 3 до 35 карактери.

Сепак, нема секое име да биде достапно. WhatsApp ќе резервира или блокира имиња на познати личности, високи функционери и организации, со цел да се спречат измами и лажно претставување.

Компанијата Meta, во чија сопственост е WhatsApp, ја опишува оваа промена како важен чекор во заштитата на приватноста.

Алис Њутн-Рекс, потпретседателка за производи во WhatsApp, изјави дека корисничките имиња се дизајнирани да им дадат на корисниците поголема контрола врз тоа кој може да го види нивниот телефонски број.

Според неа, ова е особено важно кога корисниците запознаваат нови луѓе, комуницираат во поголеми групни разговори или не сакаат веднаш да го споделат својот приватен број.

Слична функција уште во 2024 година воведе и апликацијата Signal, која важи за една од најбезбедните апликации за комуникација.

Дали ова значи целосна приватност?

Иако експертите ја поздравуваат промената, дел од нив повикуваат на претпазливост.

WhatsApp не го користи содржинскиот дел од приватните пораки за рекламирање, бидејќи тие се заштитени со енкрипција од крај до крај. Тоа значи дека содржината на пораките не може да ја чита ниту компанијата.

Сепак, Meta може да користи одредени метаподатоци, односно податоци поврзани со начинот на користење на услугата, за подобрување и оптимизација на своите системи и рекламни алгоритми.

Затоа, новата функција претставува важен чекор за поголема приватност, но не значи дека WhatsApp станува целосно анонимна апликација.

Што уште се менува?

Кога новата функција целосно ќе се примени, телефонските броеви нема да бидат видливи за нови контакти доколку корисникот одбере да комуницира преку корисничко име.

Нема да постои јавен именик на кориснички имиња, ниту систем што предлага профили. За да контактирате некого, ќе треба да го знаете точното корисничко име.

Телефонскиот број и понатаму ќе биде потребен за креирање на самиот налог.

Минималната возраст за користење на платформата останува 13 години.