Извештајот за напредокот на Македонија беше усвоен на пленарна седница во Стразбур со 411 гласа „за“ и 120 „против“.

Европскиот парламент го усвои извештајот за напредокот на Македонија за 2025 година, во кој останува повикувањето на Вториот протокол кон Договорот за добрососедство со Бугарија. Резолуцијата беше поддржана од 411 европратеници, додека 120 гласаа „против“.

Гласањето се одржа по дебата за деловите од текстот поврзани со обврските на Македонија според преговарачката рамка со Европската Унија, особено за прашањата што произлегуваат од односите со Бугарија.

Спорен беше амандманот 3, предложен од известувачот Томас Вајц, со кој се бараше бришење на ставот 73 од резолуцијата. Амандманот не беше усвоен, со што во документот останува формулацијата што го споменува Вториот протокол. За задржување на ставот гласале 338 европратеници, додека 126 биле за негово бришење.

Доколку амандманот беше усвоен, извештајот немаше конкретно да го спомене Вториот протокол кон Договорот за добрососедство меѓу Македонија и Бугарија. Токму затоа овој дел од текстот беше во фокусот на расправата.

Во ставот 73 се повикува Заедничката историска комисија да постигне „јасни и опипливи резултати“, при што нејзината работа треба да се заснова на „објективни, автентични и докажани историски извори и документи“. Формулацијата е поврзана со Вториот протокол и го содржи и концептот на „заедничка историја“.

Во извештајот повторно се нагласува и обврската на Македонија да ги спроведе уставните измени. Се потврдува ставот на Советот на ЕУ дека следната меѓувладина конференција може да се одржи штом Скопје ги спроведе потребните уставни измени во согласност со своите внатрешни процедури.

Во друг дел од текстот, Европскиот парламент изразува загриженост за прашања поврзани со културното наследство и историските споменици. Во ставот 71 се осудуваат обидите за замена или уништување историски споменици и артефакти, а се споменува и потребата од отворање на архивите на југословенските тајни служби УДБА и КОС, кои се чуваат во Македонија и Србија.

Извештајот содржи и критики за недоволен напредок во повеќе области поврзани со реформите, владеењето на правото и европската агенда. Во него се нагласува потребата од посилна реформска динамика, како и од исполнување на обврските што се дел од пристапниот процес.

Еден од важните инфраструктурни делови во извештајот е Коридорот 8. Европратениците ја нагласуваат неговата стратешка важност и ја поддржуваат изградбата на прекуграничниот железнички тунел меѓу Македонија и Бугарија, како дел од пошироката поврзаност во регионот.

Во документот се споменува и потребата од спроведување на одлуките на Европскиот суд за човекови права, како дел од пошироките европски стандарди што земјата треба да ги почитува на патот кон ЕУ.

Усвојувањето на извештајот не носи директна правна промена во пристапниот процес, но има политичка тежина. Тој ја покажува позицијата на Европскиот парламент за тоа како треба да продолжи европскиот пат на Македонија и кои прашања Брисел ги смета за клучни во следната фаза.