Мерните станици на Управата за хидрометеоролошки работи во 11 часот измерија 35,3 степени во Гевгелија и 33 степени во Скопје на Зајчев Рид. Иако четврток и петок носат претежно сончево време со изолирани попладневни нестабилности, синоптичарите најавуваат дека за време на претстојниот викенд ќе се развијат поинтензивни процеси со пороен дожд, силен ветер и локални невремиња со град.

Официјалните мерења на УХМР во 11 часот покажуваат високи вредности низ целата држава. Зад Гевгелија со 35,3 степени се најдоа Струмица со 32,4 степени, Кавадарци со 32,3 и Демир Капија со 32,2 степени. Во главниот град мерната станица Скопје-Петровец регистрираше 31,6 степени. Најсвежо претпладнево беше на Попова Шапка со 19,3 степени и во Крушево со 24 степени. Денешните максимални дневни температури ќе се задржат на високо ниво со слаб до умерен северозападен ветер.

Во петок времето ќе биде сончево и топло со мала до умерена облачност и умерен северен ветер. Промената на динамиката започнува во сабота и недела, кога претпладневните сончеви периоди ќе бидат заменети со попладневна нестабилност.

Во сабота минималните температури ќе се движат од 13 до 22 степени, а максималните од 34 до 39 степени. Во недела максималната температура ќе достигне меѓу 32 и 37 степени. Нестабилната воздушна маса ќе донесе услови за појава на локално невреме проследено со силни електрични празнења, интензивен пороен дожд и град.

Дневниот хидролошки билтен на УХМР покажува критични состојби на природните езера и реките. Нивото на Дојранското Езеро утрово е измерено на 145,09 метри надморска височина, што е за 104 сантиметри под договорениот минимум и значително под августовскиот просек од 147,69 метри. Водата во Дојран бележи утринска температура од 27,2 степени. Речното корито на реката Струмица кај мерната станица Сушево е целосно суво.