По неколку недели со екстремни температури, Балканот се подготвува за значителна промена на времето. Студен воздушен продор ќе донесе пад на температурите, нестабилност и локални бури, а во делови од регионот живата во термометрите ќе биде и до 12 степени под просекот.

По долг период на топлотни бранови што зафатија голем дел од Европа, синоптичката слика почнува да се менува. Во наредните денови над Централна Европа и Балканот ќе навлезе посвеж воздушен бран, кој ќе донесе осетно олеснување по екстремните горештини.

Според анализите на метеоролошкиот портал Severe Weather Europe, промената е поврзана со засилена атмосферска циркулација во повисоките слоеви на атмосферата, што ќе овозможи продор на постудени и нестабилни воздушни маси кон јужните делови на Европа.

Температурите паѓаат под 30 степени

Под влијание на длабок циклон, дневните температури постепено ќе се нормализираат и во многу региони ќе се вратат на сезонските вредности. На делови од Балканот, по периодот со температури над 35 степени, се очекува максималните температури да се спуштат под 30 степени, а вечерите да станат значително посвежи, со услови што повеќе ќе потсетуваат на почеток на есен.

Најсилно заладување кон крајот на неделата

Метеоролозите најголема промена очекуваат во петок и сабота.

Во делови од: јужниот Балкан, Грција, јужна Италија, температурите може да бидат дури 10 до 12 степени пониски од вообичаените за крајот на јули. Овој пад ќе биде особено забележлив по продолжениот топлотен период, кога организмот беше изложен на екстремно високи температури.

Следуваат и бури и невреме

Наглото продирање на студен воздух ќе создаде услови за атмосферска нестабилност.

Се очекуваат: локални грмежи, краткотрајни поројни врнежи, засилени ветрови и можни силни бури во одделни региони. Најголем ризик од поинтензивни невремиња се прогнозира од среда до петок, кога студениот бран ќе се движи кон Јонското Море и Грција.

Опасноста од пожари останува висока

Иако дождовите ќе донесат одредено олеснување и ќе помогнат во намалување на сувоста на почвата, експертите предупредуваат дека тие нема да бидат доволни целосно да го намалат ризикот од пожари.

Причината е долгата сушна сезона и наталожената сувост по повеќенеделните горештини.