Додека граѓаните секојдневно заглавуваат на патот меѓу Прилеп и Битола поради изградбата на автопатот, државата најавува привремено решение: железничка линија Прилеп-Битола-Жабени со повратна карта од 150 денари. Линијата, според најавите, треба да биде пуштена најдоцна до јуни и е замислена како олеснување за сите што секојдневно патуваат меѓу двата града, како и за вработените во индустриската зона Жабени.
Најавата ја соопшти министерот за транспорт и врски Александар Николоски на средба во Битола со регионалните комори од Прилеп и Битола. Образложението е јасно: поради градежните работи на автопатот, комуникацијата на оваа делница е сериозно отежната, а патувањето низ околу 40 километри често се претвора во долги застои, нервоза и доцнења.
Дел од возилата веќе се пренасочуваат и по стариот регионален пат, што дополнително го продолжува патувањето. Наместо вообичаено движење меѓу двата града, дел од патниците сега губат и по еден час или повеќе на релативно кратка релација. Во такви околности, железничката врска се претставува како побрза и поевтина алтернатива.
Според Николоски, во тек се разговори со Македонски железници – Инфраструктура и Транспорт за линијата да почне да функционира најдоцна до јуни. Промотивната цена на повратниот билет би изнесувала 150 денари, што, според министерот, е поевтино и од паркинг, а уште повеќе во споредба со трошоците за гориво и секојдневно возење со автомобил.
Паралелно со оваа мерка, од Владата продолжуваат и со пораките дека автопатот ќе се гради со засилено темпо. Николоски рече дека според уверувањата што ги добил од изведувачите, веќе следната пролет би можело да се вози по првите километри од новиот автопат на потегот Прилеп-Битола. Целосното завршување, пак, се најавува пред рокот, односно до пролетта 2029 година.
Министерот најави и дека до јуни или јули треба да биде познато конечното решение за продолжување на работите на патниот правец по тунелите кај Фариш. Според него, приоритет е да се затвори делот од Фариш кон Прилеп, односно да се реши тесното грло кај Плетвар и да се обезбеди поквалитетно патно поврзување до Битола.
Во меѓувреме, граѓаните ќе чекаат и автопат, и побрз пат, и решение за секојдневниот хаос на оваа делница. До тогаш, најавениот воз од 150 денари треба да ја игра улогата на привремен спас за една од најфреквентните релации во југозападниот дел од земјата.
