Високото ниво на витамин Б12 во крвта кај онколошките пациенти најверојатно е последица од самиот развој на болеста, а не нејзин причинител. Голема клиничка анализа на податоци од 37.106 пациенти со колоректален карцином, објавена во списанието Cancer Research Communications, открива директна врска помеѓу покачениот Б12 и поагресивните форми на рак, пренесува ScienceAlert. Наодите фрлаат нова светлина врз сложениот биолошки механизам на овој микронутриент.

Истражувачите од Медицинскиот факултет при Универзитетот во Тексас анализирале здравствени досиеја на пациенти од 108 здравствени системи низ светот, кај кои биле направени крвни анализи во периодот на поставување на дијагнозата. Резултатите покажале јасна разлика во исходот на лекувањето. Пациентите со вредности на Б12 над 1.000 пикограми на литар имале просечно преживување од околу пет години, додека оние со нормални вредности преживувале во просек речиси 11 години.

Статистичката обработка покажала дека лицата со покачен Б12 имале приближно двојно поголем ризик од смрт во споредба со пациентите со ниски вредности, како и 65 отсто поголем ризик во однос на оние со нормални нивоа. Кај оваа група значително почесто била дијагностицирана болест во четврти стадиум, со зголемена појава на нови метастази во рок од една година, особено на црниот дроб.

Директната лабораториска анализа на стотици примероци од тумори на дебелото црево утврдила зголемена активност на генот MTR. Овој ген кодира ензим за чие функционирање е неопходен токму витаминот Б12 за синтеза на градежните блокови на ДНК. Пациентите кај кои овој ген бил најактивен имале најниска стапка на преживување.

Овие податоци укажуваат дека агресивните малигни клетки забрзано го трошат и акумулираат витаминот за да го овозможат своето брзо делење. Дополнително, црниот дроб претставува главен орган за складирање на Б12 во организмот, па оштетувањата или метастазите во црниот дроб го нарушуваат начинот на кој телото го чува и ослободува овој витамин во крвотокот.

Витаминот Б12, односно кобаламин, е суштински за создавање на црвените крвни зрнца, синтезата на ДНК и заштитата на нервниот систем. Бидејќи природно се наоѓа исклучиво во храна од животинско потекло, тој често се препорачува како суплемент кај лица со еднолична исхрана или дигестивни проблеми. Сепак, експертите посочуваат дека внесот преку исхраната и концентрацијата во крвта не се секогаш во директна зависност.

Резултатите од студии спроведени во 2024 година кај пациенти на имунотерапија и кај лица со карцином на усна празнина потврдиле слични модели на полош исход при покачен Б12. Прегледот на научната литература нагласува дека ваквите наоди се типичен пример за реверзна каузалност, каде што самото присуство и ширење на туморот доведува до покачување на витаминот во крвта, а не обратно.