Бројот на заразени со вирусот Западен Нил во Грција бележи драматичен раст од почетокот на годината, достигнувајќи 157 регистрирани случаи и 13 смртни исходи. Според официјалните податоци од Националната организација за јавно здравје на Грција (ЕОДИ), ситуацијата брзо се влошува откако пред само неколку недели, при крајот на јули, беа евидентирани вкупно 42 случаи.

Најголем дел од новозаражените лица се откриени на поширокото подрачје на главниот град Атина. Здравствените служби известуваат дека кај дел од пациентите се развиле тешки форми на болеста кои директно го зафаќаат централниот нервен систем. Меѓу регистрираните тешки медицински состојби се издвојуваат енцефалитис, менингитис и други сериозни невролошки компликации.

Главни преносници на вирусот Западен Нил се комарците. Поголемиот дел од инфицираните лица обично немаат симптоми или минуваат со многу благи манифестации, додека тешките форми на болеста и компликациите се појавуваат главно кај постарите лица и кај пациентите со претходни хронични заболувања.

Заразата не е ограничена само на јужниот сосед. Зголемување на бројот на инфицирани лица бележат и други земји во јужна Европа, поради што Светската здравствена организација веќе упати апел за зголемена претпазливост и превенција.