Американската вселенска агенција НАСА објави снимка од изгрејсонцето на Марс, направена со роверот „Кјуриосити“. На видеото се гледа како сончевите зраци постепено ги осветлуваат карпестите врвови и гребени, формирани пред повеќе милијарди години, нудејќи редок поглед на пејзажот на Црвената Планета.

Роверот „Кјуриосити“ слета на Марс во 2012 година, во кратерот Гејл, во близина на екваторот на планетата. Од 2014 година постепено се искачува по планината Шарп, висока околу пет километри, која се издига од дното на кратерот, а неговите истражувања им помагаат на научниците да ја реконструираат геолошката историја на Марс.

Снимката е направена со камерата Масткам околу еден час по изгрејсонцето. Во далечината се забележуваат карпи и гребени обликувани од ветерот, чии необични форми сведочат за долготрајните природни процеси на површината на планетата.

„Светлите карпести врвови во далечината припаѓаат на слој што значително се разликува од сите слоеви низ кои роверот поминал досега. Сметаме дека некогаш бил составен од седимент што го носел ветерот, можеби песок, а можеби дури и пепел од вулканска активност во близина“, изјави научникот Ешвин Васавада од Лабораторијата за млазен погон на НАСА, одговорен за мисијата „Кјуриосити“.

Според него, откако седиментот се претворил во карпа, ветерот во текот на милиони години го обликувал нејзиниот површински слој, создавајќи гребени познати како јарданзи. Се проценува дека овој геолошки слој настанал пред околу три милијарди години и се протега на околу 16 километри долж северозападниот дел на планината Шарп.

Научниците сметаат дека слојот веројатно не е дел од непрекинатиот низ карпести слоеви од кои е изградена планината, туку дека се формирал подоцна, над геолошки прекин. Тоа значи дека постарите слоеви претходно биле изложени на ерозија, пред врз нив да се наталожат нови материјали.

Во текот на постепеното искачување, „Кјуриосити“ совладал висинска разлика поголема од еден километар. Планината Шарп е особено важна за истражувањата бидејќи нејзините карпести слоеви содржат траги од различни периоди во геолошкото минато на Марс.

Со проучувањето на тие слоеви, научниците дознаваат повеќе за езерата и потоците што некогаш постоеле во овој дел од планетата, во период кога Марс бил потопол и повлажен отколку денес.