Најмалку 24 лица загинаа во Пакистан по експлозија на бомба чија цел бил воз што превезувал воен персонал во југозападната покраина Белуџистан. Нападот се случил во недела додека возот минувал низ станицата Чаман Фатак во Квета, главниот град на покраината.
Висок функционер изјави за агенцијата Франс-прес дека автомобил наполнет со експлозив се забил во еден од вагоните, предизвикувајќи силна експлозија. Снимките од местото на настанот прикажуваат уништени вагони и изгорени остатоци од возот и возилото. Одговорноста за нападот наводно ја презела Ослободителната војска на Белуџистан (BLA), група која се бори за независност на регионот.
Пакистанскиот премиер Шехбаз Шариф остро го осуди нападот, нарекувајќи го „одвратен терористички чин“ и порача дека ваквите напади нема да ја поколебаат решителноста на државата.
„Изразувам длабоко сочувство до семејствата на жртвите и посакувам брзо закрепнување на повредените“, изјави тој.
Нападот го осуди и сенаторката Шери Рехман, која порача дека меѓу жртвите има и жени и деца кои патувале на празнични прослави. Таа истакна дека сторителите на ваквите напади ќе се соочат со силен одговор од безбедносните сили.
