По повод Денот на Европа ќе се одржи велосипедска тура околу Охридското Езеро, која ќе ги поврзе Струга, Поградец и Охрид. Турата ќе биде долга 90 километри и е замислена како заедничко возење низ три града, со акцент на дружење, рекреација и симболично одбележување на европските вредности.
Од Европска куќа Струга информираат дека учесниците може да очекуваат заедничко возење, нови познанства по пат, освежување и музички пунктови што треба да ја направат турата поатрактивна и подинамична. За безбедноста на учесниците ќе има и полициска и медицинска поддршка.
Според најавата, за учесниците се обезбедени и брендирани материјали, а на крајот е предвиден заеднички финиш и ручек како завршница на настанот.
Организаторите посочуваат дека бројот на учесници е ограничен и пријавувањето ќе се одвива по принципот „прв пријавен, прв услужен“.
Настаните од ваков тип се обидуваат Денот на Европа да го приближат до граѓаните и преку спорт, дружење и заедничко искуство на отворено.
