Украина ѝ се извини на Грција поради инцидентот со поморскиот дрон што минатиот месец беше пронајден во грчките територијални води, соопшти портпаролот на украинското Министерство за надворешни работи, Хеорхиј Тихи.

Извинувањето следува откако Грција на 3 јуни упати официјален дипломатски протест до Украина. Пловилото, за кое Атина тврди дека било украинско, го пронашле рибари на 7 мај на брегот на островот Лефкада, што предизвика дипломатски тензии меѓу двете земји.

„Тоа беше последица на околностите предизвикани од руската агресија врз Украина“, изјави Тихи.

Тој додаде дека Киев останува посветен на почитување на меѓународното право и безбедноста на пловидбата, како и дека сака да спречи слични инциденти во иднина.

Тихи му се заблагодари на грчкиот народ за, како што рече, „постојаната поддршка“ за Украина и нагласи дека Киев високо ги цени пријателските односи со Атина.

„Овој инцидент, како и слични случаи во други региони, покажува дека руската агресија врз Украина претставува закана не само за нашата земја, туку и за соседните пријателски држави, Европа и светот“, рече Тихи.

Во дипломатскиот протест, Грција предупреди дека присуството на дронот претставувало закана за поморскиот сообраќај и можело да доведе до цивилни жртви или еколошка штета.

Тихи истакна дека Украина и Грција ја делат загриженоста за заканите врз меѓународната и регионалната безбедност, вклучително и безбедноста на пловидбата и активностите на руската „флота во сенка“.

Од почетокот на војната се забележани повеќе случаи во кои руски и украински дронови завршиле на територија на земји членки на НАТО, често како последица на противвоздушна одбрана или електронско попречување.

Во посебен инцидент, поморски дрон експлодирал на 5 јуни во романското црноморско пристаниште Констанца, додека експерти го прегледувале по извлекување од морето. Романските власти се сомневаат дека станува збор за украински дрон врз кој влијаело електронско попречување.