Периодот на сончево и многу топло време продолжува во следните неколку денови под влијание на топла воздушна маса од југ. Дневните температури во повеќе региони ќе се искачат до 40 степени, додека ноќите исто така ќе останат тропски топли. Попладневните часови, сепак, носат развој на нестабилна облачност со пороен дожд, грмежи и можност за краткотрајно невреме.

Во Скопје и околината времето ќе биде сончево и топло, но во попладневните часови се очекува зголемување на облачноста. Во делови од скопската котлина ќе има услови за краткотраен пороен дожд и ретки грмежи. Долж Повардарието ќе дува повремено засилен ветер од северен и североисточен правец, кој ќе донесе привремено освежување за време на попладневната нестабилност.

УХМР прогнозира дека слично време ќе се задржи до 10 август. Утринските температури во земјава ќе се движат во опсег од 13°C до 24°C, додека максималните дневни ќе достигнат од 33°C до 40°C. Попладневниот локален развој на нестабилност, проследен со поројни врнежи и грмежи, ќе биде присутна појава во поголем дел од деновите, додека ветерот повремено ќе го менува правецот од северен кон јужен.