Тројцата лидери на најголемите нуклеарни сили во светот – Доналд Трамп, Си Џинпинг и Владимир Путин – се најдоа на иста маса во кинескиот град Шенжен. Средбата, што се одржува на маргините на самитот на АПЕК, е прв официјален заеднички состанок на претседателите на САД, Кина и Русија.
„Денес навистина испишуваме историја“, изјави американскиот претседател Доналд Трамп на почетокот на разговорите. Тој рече дека тројцата лидери имаат многу теми за дискусија и посебна одговорност да одржуваат отворен дијалог за прашања што не ги засегаат само нивните граѓани, туку и целиот свет.
Трамп ги критикуваше претходните светски лидери кои избегнувале разговори со држави со кои имале несогласувања. Според него, одбивањето да се разговара за проблемите не донело решение. Путин, пак, ја нагласи заедничката одговорност на трите земји за меѓународниот мир и безбедност. Рускиот претседател рече дека САД, Кина и Русија, како победнички сили во Втората светска војна, треба да го зачуваат и зајакнат системот на меѓународното право.
Тој оцени дека трите држави имаат „многу заеднички интереси“ во решавањето на регионалните конфликти, меѓу кои го посочи и војната во Украина. Според Путин, тие можат значително да придонесат за зајакнување на мирот и стабилноста.
Кинескиот претседател Си Џинпинг повика на соработка и потсети дека историјата треба да биде поука за справувањето со денешните глобални предизвици. „Тешките времиња покажуваат кој навистина е подготвен да преземе одговорност“, порача тој, според Ројтерс.
Средбата следува по одделните разговори на Трамп со Путин и Си. Во разговорот со рускиот претседател, според Кремљ, доминирала темата за Украина. Трамп, пак, по средбата со кинескиот лидер изјави дека сака да разговара и за можностите за завршување на војната.
Покрај Украина, на дневен ред се и конфликтот со Иран, нуклеарното вооружување, меѓународната трговија и вештачката интелигенција. Состанокот се одржува во период на засилени геополитички тензии и различни интереси на трите сили, особено околу безбедноста и контролата на нуклеарното оружје.
И покрај историското значење на средбата, не се очекуваат големи конкретни договори, особено за нуклеарното разоружување. Сепак, самиот факт дека лидерите на САД, Кина и Русија разговараат заедно за прашања што директно влијаат врз глобалната безбедност е дипломатски настан со големо меѓународно внимание.
