Франција и понатаму е зафатена од силен топлотен бран, кој покрај рекордно високите температури предизвикува и сериозни последици по безбедноста и здравјето на населението. Од 18 јуни досега во земјата се регистрирани 74 смртни случаи од давење, соопшти францускиот министер за внатрешни работи Лоран Нунјез.

Во изјава за францускиот весник „Паризиен“, Нунјез посочи дека најголем дел од трагедиите се случиле на необезбедени капалишта, како што се реки, езера и бари, а имало и случаи на давење во приватни базени.

Значително зголемен број интервенции поради горештините

Министерот истакна дека во регионот Ил де Франс, каде се наоѓа и Париз, службите за итна помош бележат драматичен пораст на интервенциите поврзани со здравствени проблеми предизвикани од високите температури.

„Последните податоци покажуваат зголемување од 122 проценти на бројот на интервенции во споредба со 2025 година“, изјави Нунјез. Во меѓувреме, француската телевизија БФМ ТВ објави дека топлотниот бран постепено слабее во западните делови на земјата, но во голем број региони температурите и понатаму остануваат екстремно високи. Дури 37 департмани и натаму се под највисоко ниво на метеоролошко предупредување.

Паднаа повеќе од 200 температурни рекорди

Поради екстремните временски услови, голем број јавни настани и манифестации беа откажани за време на викендот, со цел да се намали притисокот врз службите за итна помош и болниците. Според француските метеоролошки служби, во текот на денот биле соборени или изедначени дури 202 температурни рекорди, а во некои делови од земјата температурата достигнала и 43,2 степени Целзиусови.

Француските власти повторно апелираат граѓаните да избегнуваат изложување на сонце во најтоплиот дел од денот, да внесуваат доволно течности и да не се капат на необезбедени места, бидејќи токму тие се причина за најголемиот број трагични случаи за време на актуелниот топлотен бран.