Екстремниот топлотен бран што ја зафати Европа ова лето значително го забрза топењето на швајцарските глечери, а научниците предупредуваат дека состојбата е сериозно загрижувачка. Според експертите, снегот на глечерите во Швајцарија се стопил неколку недели порано од вообичаено, поради што сезоната на забрзано губење на мраз започнала многу порано.

На 29 јуни, глечерот Ронски глечер го достигнал таканаречениот „ден на губење на глечерот“ – моментот кога целосно се топи снежната покривка акумулирана во текот на зимата, по што започнува топењето на постариот мраз, создаван со децении, па дури и со векови.

Директорот на Швајцарската служба за следење на глечерите, Матијас Хус, предупреди дека пред глечерите претстојат уште околу три месеци интензивно топење.

„Ова е навистина загрижувачка ситуација“, изјави Хус.

Втор најран датум во историјата на мерењата

Според научниците, двата топлотни бранови што ја погодија Европа оваа година, во комбинација со слабите зимски снежни врнежи, довеле до тоа „денот на губење на глечерот“ да биде втор најран од почетокот на мерењата. Единствено во рекордната 2022 година овој момент настапил три дена порано.

Хус посочи дека за време на јунскиот топлотен бран количината вода што се стопила од швајцарските глечери била толку голема што на секои шест секунди, во период од две недели, можела да наполни по еден олимписки базен. На една мерна станица на Ронскиот глечер бил регистриран губиток од околу 1,5 метри мраз за само две недели екстремно високи температури.

Последиците од климатските промени ги забележуваат и посетителите на глечерите.

Германскиот турист Хари Блок, кој го посетува Ронскиот глечер повеќе од 50 години, изјави дека промените се потресни.

„Можам да заплачам“, рече тој, додавајќи дека глечерот, кој некогаш бил висок околу 80 метри, денес е значително намален.

„Овде ги гледате климатските промени. Тоа се климатските промени“, истакна Блок.