Македонија ја очекува нов изразен топлотен бран. Според прогнозата на Управата за хидрометеоролошки работи, од продолжениот викенд до крајот на следната седмица времето ќе биде сончево и многу топло, со мала до умерена облачност.

Дневните температури насекаде ќе се искачат над 32 степени, додека во најтоплите делови од земјата ќе надминат 40 степени.

Особено загрижувачки е што високите температури ќе се задржуваат и во текот на ноќта, поради што нема да има значително разладување ниту во раните утрински часови.

До 41 степен во четврток

Во недела се очекуваат максимални температури од 32 до 39 степени, а во понеделник од 33 до 39 степени.

Дополнително затоплување се прогнозира од вторник, кога дневните температури ќе се движат од 34 до 40 степени. Истите вредности се очекуваат и во среда.

Најтопло ќе биде во четврток, кога максималната температура во одредени делови од земјата може да достигне 41 степен.

Минималните температури постепено ќе се зголемуваат и ќе се движат од 11 до 24 степени. Во потоплите градски средини тоа може да значи тешки и тропски ноќи без вистинско освежување.

Зголемен ризик за здравјето

Во најтоплиот дел од денот се препорачува избегнување директна изложеност на сонце и напорна физичка активност, редовно внесување течности и престој во разладени простории.

Најмногу внимание треба да посветат повозрасните лица, хронично болните, бремените жени, малите деца и луѓето што работат на отворено.

Граѓаните не треба да оставаат деца или животни во паркирани автомобили, дури ни накратко, бидејќи температурата во затворено возило може многу брзо да достигне опасно ниво.