Винарската визба „Тиквеш“ освои девет награди на 13. издание на меѓународниот вински натпревар SAKURA – Japan Women’s Wine Awards, еден од најзначајните вински настани во Азија. Меѓу признанијата се две Гран-при награди, два двојни златни медали, четири златни и еден сребрен медал.
Највисоките награди ги освоија вината Barovo Rosé 2024 и Vranec Luda Mara 2022. Barovo Rosé 2024 доби двоен златен медал и Гран-при награда за најдобро розе вино, додека Vranec Luda Mara 2022 освои златен медал и Гран-при награда за вино што најдобро се комбинира со корејската кујна.
Меѓу наградените вина се и Bela Voda Red 2021, кое освои двоен златен медал, како и Domaine Lepovo Chardonnay 2023, Babuna Red 2022 и Alexandria Premium Cuvée Rosé 2024, кои добија златни медали. Barovo Red 2021 беше наградено со сребрен медал.
Од „Тиквеш“ велат дека признанијата се резултат на долгорочната посветеност кон квалитетот и создавањето вина со јасен идентитет и тероарска автентичност. „Нашата амбиција е македонското вино да биде препознаено не само по вкусот, туку и по карактерот што го носи“, посочуваат од винарницата.
SAKURA – Japan Women’s Wine Awards е натпревар со специфичен концепт, на кој вината ги оценуваат повеќе од 400 сертифицирани жени сомелиери и вински експерти од Јапонија. Посебен фокус се става на квалитетот на вината и нивната усогласеност со азиската гастрономија.
Со повеќе од 4.000 пријавени вина годишно, SAKURA се смета за важна платформа за позиционирање на вината на јапонскиот и азискиот пазар. Со освоените девет признанија, „Тиквеш“ дополнително ја зацврстува својата позиција како еден од најрелевантните вински производители од регионот и значаен претставник на македонското вино на глобалната сцена.
