„Тиквеш“ повторно ја изнесе македонската винска приказна на меѓународна сцена. На годинешното издание на International Wine Challenge 2026 во Лондон, едно од највлијателните вински оценувања во светот, црвеното вино „Babuna Red 2023“ освои златен медал и импресивни 95 IWC поени.
Со ова признание, „Babuna Red 2023“ се издвои меѓу највисоко оценетите вина во својата категорија. Оценувачите го опишуваат како вино со силна комбинација на моќ и елеганција, богато, но одмерено, со интензивни ароми на шумско овошје, зачински ноти и суптилни зрели тонови.
Покрај златото за „Babuna Red 2023“, „Тиквеш“ освои и низа други признанија, што ја потврдуваат стабилноста на квалитетот низ повеќе вински линии. Сребрени медали добија белите вина „Bela Voda“ од бербите 2023 и 2024, „Barovo 2024“, како и црвеното вино „Bela Voda 2021“.
Бронзени медали им беа доделени на „Domaine Lepovo Grand Cuvée 2023“, „Domaine Lepovo Chardonnay 2024“, „Bela Voda Red 2022“, „Barovo Sauvignon Blanc 2025“, „Barovo White 2025“, „Barovo Red 2021“, „Luda Mara White Cuvée 2025“, „Alexandria Premium Cuvée White 2025“, „Marks & Spencer Found Kratosija 2024“ и „Smederevka 2025“.
Како вина што заслужуваат посебно внимание беа издвоени и „Domaine Lepovo Chardonnay 2023“, „Luda Mara Red Cuvée 2024“ и „Babuna White 2025“.
International Wine Challenge е основан во 1984 година и важи за еден од најрелевантните вински натпревари во светот. Секоја година се оценуваат вина од повеќе од 50 земји, а во процесот учествуваат над 500 меѓународни експерти, меѓу кои мастери за вино, сомелиери, винари, критичари, купувачи и едукатори.
Оценувањето се спроведува преку „слепа“ дегустација и повеќестепена анализа, при што секое вино се дегустира најмалку двапати во различни денови. Конечните одлуки дополнително ги проверуваат водечките судии, со цел да се обезбеди објективност и конзистентност.
Новите признанија од Лондон се уште една потврда дека македонските вина можат да се натпреваруваат во најсилна меѓународна конкуренција. За „Тиквеш“, златото за „Babuna Red 2023“ не е само медал, туку и уште еден доказ дека локалниот тероар, кога е споен со современ вински пристап, може да зборува на глобален јазик.
