Фестивалот „Pumpkimania“, кој се одржува во замокот Грот-Бејгарден, годинава нуди спектакуларни украси направени од тикви во различни големини и бои.

Најголемата атракција е џиновска тиква тешка дури 772 килограми, која беше претставена за време на традиционалното мерење на најголемите плодови. Организаторите очекуваат околу 50.000 посетители до завршувањето на фестивалот на 1 ноември.

Годинешната тема е „Магијата на шумата“, па посетителите можат да видат скулптури на лисици, бувови и елени направени од тикви. Но, фестивалот не се сведува само на декорации.

Некои од најголемите тикви се претвораат во импровизирани чамци, со кои се организираат необични возења по езерото во замокот.

За посетителите се предвидени и работилници за резбање тикви, како и посебни активности поврзани со Ноќта на вештерките. Тиквите пристигнуваат од различни делови на Белгија, но и од Германија и Португалија.

И покрај тешката земјоделска сезона поради жешкото лето, организаторите успеале да создадат впечатлив есенски амбиент. Фестивалот покажува дека тиквата може да биде многу повеќе од состојка за супа или традиционален симбол на Ноќта на вештерките.