Дваесет и едногодишен Австриец со потекло од Македонија призна вина за планирање напад на концерт на Тејлор Свифт во Виена во 2024 година. Нападот бил спречен во последен момент, а трите планирани концерти на американската поп-ѕвезда тогаш беа откажани.
Обвинетиот, идентификуван како Беран А., бил уапсен на 7 август 2024 година, еден ден пред првиот од трите закажани концерти во Виена.
На почетокот на судењето во Винер Нојштат, во близина на австриската престолнина, тој изјавил дека делумно ја признава вината. На прашањето дали признава вина за обвиненијата поврзани со планираниот напад на концертот, одговорил: „Да“.
Според обвинението, тој планирал да нападне посетители надвор од концертната сала.
Обвинетиот пред судот изјавил дека до средината на 2023 година не бил радикален муслиман, но дека тоа се променило најдоцна до јануари 2024 година, по контакт со исламисти.
Судењето не се однесува само на планираниот напад во Виена. Беран А. и словачкиот државјанин Арда К. се обвинети и за планирање напади на Блискиот Исток, кои не биле реализирани, како и за давање морална поддршка на трет маж, уапсен под сомнение за напад во Мека.
Обвинителството тврди дека Беран А. користел видеоупатства од Исламска држава за подготовка на експлозивна направа, направил мала количина експлозив и нелегално се обидел да набави оружје за планираниот напад.
Тој се товари за повеќе кривични дела поврзани со тероризам, припадност на криминална организација и изрекување опасна закана. Доколку биде осуден, му се заканува казна од 10 до 20 години затвор.
Обвинителите наведуваат и дека двајцата обвинети, заедно со трет маж, сите поранешни школски пријатели, планирале одделни напади на Блискиот Исток пред концертите на Свифт. Според обвинението, Беран А. патувал во Дубаи, Арда К. во Истанбул, а третиот маж во Мека.
Арда К. признал вина за патување во Истанбул со намера да изврши напад, а Беран А. признал вина и во врска со своето патување во Дубаи. Сепак, двајцата се изјасниле дека не се виновни за давање морална поддршка на третиот маж, тврдејќи дека тој веќе бил одлучен да дејствува самостојно.
Судењето е планирано да трае четири дена, а последниот закажан термин е 21 мај.
