По изборниот дебакл на ЦДУ во Мекленбург-Западна Померанија и Берлин, во германската партија се одржал состанок зад затворени врати – без канцеларот и лидер на ЦДУ Фридрих Мерц. Седум од осумте покраински премиери од редовите на ЦДУ, заедно со неколку покраински партиски лидери, по претходниот состанок со Мерц во централата на партијата продолжиле со разговори без него. Според информациите на ДПА, состанокот траел околу два часа во претставништвото на покраината Рајнска област-Пфалц во Берлин.
На состанокот биле, меѓу другите, покраинскиот премиер на Рајнска област-Пфалц Гордон Шнидер, лидерот на ЦДУ во Баден-Виртемберг Мануел Хагел, премиерот на Хесен Борис Рајн, премиерот на Шлезвиг-Холштајн Даниел Гинтер, премиерот на Саксонија Михаел Кречмер и лидерот на ЦДУ во Долна Саксонија Себастијан Лехнер.
Фактот што политичарите прво со Мерц разговарале во партиската централа, а потоа уште два часа продолжиле без него, го привлече вниманието на германските медиуми. Според дописникот на СВР Ено Осбург, никој од присутните не сакал да даде изјава.
„Ваков состанок, очигледно без канцеларот, во вечерта на изборниот пораз секако е експлозивен“, коментира Осбург. Според него, покраинските лидери очигледно имале потреба да разговараат меѓу себе, без присуство на Мерц.
Поддршка за Мерц – но без да му го споменат името
Само неколку дена пред изборите, сите осум покраински премиери од ЦДУ јавно застанаа зад Мерц и се спротивставија на шпекулациите за неговата политичка иднина. Во заедничката изјава тие порачаа дека сакаат заедно со канцеларот да придонесат за решавање на проблемите во Германија. Меѓутоа, во самата изјава името на Мерц не било споменато ниту еднаш.
По изборите, сепак, ситуацијата стана значително посложена. ЦДУ во Мекленбург-Западна Померанија освои само 4,9 отсто и за првпат во повоената историја не влезе во покраинскиот парламент. Во Берлин партијата исто така претрпе тежок пораз, додека Левицата излезе како најсилна партија.
Мерц: Нема оставка, продолжувам со реформите
И покрај изборниот удар и зголемениот внатрепартиски притисок, Мерц веднаш порача дека нема намера да поднесе оставка. Тој најави дека ќе продолжи да ги спроведува своите реформи и политичкиот курс на владата. Во меѓувреме, раководството на ЦДУ денеска повторно се состанува за да ги анализира изборните резултати. По состанокот на претседателството следува седница на сојузниот извршен одбор, а во вторник е закажана седница на пратеничката група на ЦДУ/ЦСУ во Бундестагот.
Состанокот без Мерц сам по себе не претставува формална одлука за промена на лидерството, но покажува дека по изборниот пораз во ЦДУ има дополнителна потреба за разговори зад затворени врати. Германските медиуми го следат како знак дека внатрепартиските несогласувања стануваат повидливи.
