Светската здравствена организација (СЗО) ги претстави новите насоки за заштита на здравјето од екстремни горештини, нагласувајќи дека зелените површини и водните ресурси се меѓу најефикасните природни решенија за справување со високите температури.

Од СЗО предупредуваат дека топлотните бранови секоја година предизвикуваат зголемен број заболувања, влошување на хроничните состојби и предвремени смртни случаи. Особено ранливи се постарите лица и граѓаните со здравствени проблеми, додека урбанизацијата дополнително го зголемува ризикот.

Германскиот министер за животна средина Карстен Шнајдер истакна дека градските дрвја, парковите, реките, шумите и мочуриштата значително ја намалуваат температурата на воздухот и помагаат во задржување на водата. Според него, под големите дрвја температурата често е за неколку степени пониска, поради што Германија вложува сè повеќе средства во природни решенија за адаптација кон климатските промени.

Регионалниот директор на СЗО за Европа, Ханс Анри П. Клуге, предупреди дека Европа се загрева побрзо од кој било друг континент. Според податоците на организацијата, повеќе од 200.000 луѓе во Европа починале како последица на екстремни горештини во последните четири години.

Новите препораки на СЗО имаат цел да им помогнат на владите и локалните власти да изградат поефикасни системи за предупредување и заштита на населението. Како пример се наведуваат Германија и Берлин, каде што веќе се спроведуваат мерки за проширување на зелените површини, создавање постудени урбани зони и информирање на граѓаните за заштита од топлотни бранови.

Берлин во 2025 година усвои акциски план за заштита од горештини и здравствени ризици, кој опфаќа десетици мерки насочени кон подобрување на условите за живот во услови на сè потопла клима.