Залихите на нафта во најразвиените економии во светот паднаа на најниско ниво од 2003 година, предупреди американската Администрација за енергетски информации (EIA), аналитичка агенција при Министерството за енергетика на САД.

Според најновите прогнози, глобалните резерви на нафта ќе продолжат значително да се намалуваат во наредните месеци. EIA проценува дека во текот на вториот квартал светските залихи ќе се намалат за 6,3 милиони барели дневно, додека во третиот квартал падот би можел да достигне 7,66 милиони барели дневно.

Еден од главните фактори за ваквата состојба е ограничениот поморски сообраќај низ Ормутскиот теснец – клучна рута за транспорт на нафта од Блискиот Исток. Поради нарушувањата во снабдувањето, многу земји беа принудени интензивно да ги користат своите комерцијални и стратешки резерви.

Како резултат на тоа, залихите на нафта во 38-те земји членки на Организацијата за економска соработка и развој (ОЕЦД) се спуштија на најниското ниво во повеќе од две децении. Во ОЕЦД членуваат САД, Канада, Јапонија, Израел, Јужна Кореја, Франција, Обединетото Кралство и други развиени економии.

Во меѓувреме, кризата ја зголеми побарувачката за американска нафта. Голем број држави ги засилија набавките од САД за да го надоместат недостигот на сурова нафта од Блискиот Исток.

Според EIA, нето-извозот на сурова нафта и нафтени деривати од САД во април достигнал рекордни 5,8 милиони барели дневно. Американските власти очекуваат просечниот нето-извоз годинава да изнесува околу 4,2 милиони барели дневно, што е значително повеќе во споредба со минатата година, кога изнесуваше 1,4 милиони барели дневно.