Барселона денеска и утре станува центар на нов обид за меѓународно поврзување на левицата. Шпанскиот премиер Педро Санчез и бразилскиот претседател Луиз Инасио Лула да Силва ги предводат собирите на прогресивни лидери и движења, со цел да испратат порака дека подемот на крајната десница не е незапирлив и дека постои политичка алтернатива.
Првиот настан, наречен „Глобална прогресивна мобилизација“, има цел да ги обедини левичарските партии и движења околу заеднички приоритети како одбрана на демократијата, мултилатерализмот и зелената транзиција. Според организаторите, собирот треба да заврши со заедничка декларација за понатамошна координација и политичко дејствување.
Вториот собир, „Во одбрана на демократијата“, е четврти ваков состанок откако иницијативата беше покрената во 2024 година од Шпанија, Бразил и други прогресивни влади, како одговор на растот на екстремната десница и засилените напади врз демократските институции.
На средбите во Барселона се очекува да присуствуваат и јужноафриканскиот претседател Сирил Рамафоса и мексиканската претседателка Клаудија Шајнбаум. Според Ројтерс, ова е и прва посета на мексикански претседател на Шпанија од 2018 година, по години тензии околу наследството од шпанскиот колонијализам.
Санчез веќе порача дека е важно прогресивните партии и влади да покажат дека припаѓаат на нешто што ја надминува дневната домашна политика. Дополнителен поттик за оваа порака доаѓа и по изборниот пораз на Виктор Орбан во Унгарија, што шпанскиот премиер го претстави како доказ дека бранот на крајната десница може да биде сопрен.
Според најавите, на вториот собир треба да се соберат околу 3.000 учесници, меѓу нив актуелни и поранешни шефови на држави, стотици градоначалници, синдикати, активисти и политички партии. Главниот секретар на Партијата на европските социјалисти, Џакомо Филибек, порача дека радикалните сили делуваат во многу земји за да спонзорираат екстремно десничарски движења и дека токму затоа левицата мора јасно да покаже дека постои друга политичка насока.
