Поголемиот дел од Англија се соочува со сериозна суша поради рекордно ниските врнежи и екстремно високите температури. Агенцијата за животна средина потврди дека седум региони официјално се прогласени за подрачја погодени од суша, меѓу кои се Лондон, долината на Темза, Источна Англија, Девон и Корнвол.

Според британските метеоролози, јули би можел да биде најсувиот месец од почетокот на мерењата. Во Англија наврнале само околу седум проценти од вообичаените врнежи, додека на југот од земјата паднал едвај еден процент од просекот. Нормални услови засега се задржани само во североисточните делови на земјата и Јоркшир.

Во исто време, четвртиот топлотен бран годинава носи температури до 35 Целзиусови степени. Надлежните предупредуваат дека комбинацијата од суша и жештини значително го зголемува ризикот од шумски пожари, а службите за итни интервенции веќе бележат стотици пожари низ Англија и Велс во текот на 2026 година.

Експертите предупредуваат дека климатските промени придонесуваат за сè почести екстремни временски појави. Засега нема најави за пообилни врнежи, па се очекува сушата да се прошири и во други делови од земјата доколку временските услови не се променат.