Претставата „Страв и надеж“ на Македонскиот народен театар, во режија на Татјана Мандиќ Ригонат, е прогласена за најдобра претстава на јубилејното 60. издание на Македонскиот театарски фестивал „Војдан Чернодрински“ во Прилеп.

Одлуката ја донесе тричленото фестивалско жири во состав Снежана Коневски Руси како претседател и членовите Дарко Лукиќ и Аида Буквиќ, кои ги оценија најдобрите остварувања во официјалната програма на фестивалот.

Наградата за најдобра режија му припадна на Дејан Пројковски за претставата „Црнила“, поставена според драмата на Коле Чашуле во продукција на Театарот „Војдан Чернодрински“ од Прилеп. Со освоени три признанија, „Црнила“ се вброи меѓу најнаградуваните претстави на годинашното фестивалско издание.

Од вкупно 15 фестивалски награди, четири не беа доделени. Станува збор за наградите за рекламен материјал, за кореографија и сценски движења, за современа сценска драматизација и адаптација, како и за современ драмски текст.

Образложувајќи ја одлуката за главната награда, претседателката на жирито Снежана Коневски Руси истакна дека „Страв и надеж“ се издвојува како целосно заокружено сценско дело.

„За мене комплетна претстава е ‘Страв и надеж’. Сите актери се подеднакво вклучени во проектот заедно со музичарите. Едноставно видовме целокупна претстава. Како традиционалист, имам око и уво да видам што е тоа што ме допира и секој член од публиката и затоа го одделуваш од другите“, изјави Коневски Руси.

Свеченото врачување на наградите ќе се одржи вечерва во 19 часот во големата сала на Центарот за култура „Марко Цепенков“ во Прилеп. Веднаш потоа, во чест на лауреатите, на сцената ќе настапи Београдско драмско позориште со претставата „Црно злато“ од Дејан Дуковски, во режија на Оливер Фрљиќ.

Јубилејното 60. издание на фестивалот уште еднаш ја потврди својата улога како најзначајна театарска манифестација во земјата, собирајќи ги најдобрите македонски театарски продукции и отворајќи простор за вреднување на современите сценски достигнувања.