Стабилно, сончево и значително топло време ќе преовладува во Македонија до средината на следната работна седмица, со дневни температури кои ќе достигнат до 38 степени Целзиусови. Управата за хидрометеоролошки работи соопшти дека по денешната локална нестабилност проследена со град во Валандовско, следува период со умерен до засилен северен ветер, особено изразен долж Повардарието.

Денешното попладне донесе ненадејна дестабилизација на атмосферата во југоисточниот дел од земјата. Метеоролошката станица и радарските слики регистрираа нестабилна воздушна маса која директно го зафати валандовскиот регион, проследена со пороен дожд, силни електрични празнења, засилен ветер и изолирана појава на град.

Во останатиот дел од земјата се задржа претежно топло време. Највисоки температури во 17 часот беа измерени во Велес и Зајчев Рид со 34,8 степени, додека во Гевгелија живата на термометарот се искачи на 34,6 степени. Најсвежо беше на Попова Шапка со 19,3 степени.

Од петок започнува стабилен временски период со мала до умерена локална облачност. Утринските температури за викендот ќе се спуштат меѓу 10 и 20 степени, додека максималните дневни вредности постепено ќе се покачуваат од петочните 36 до 38 степени во понеделник.

Во Скопје и околината викендот ќе помине во знак на сончево време со умерена облачност и слаб до умерен ветер од променлив правец.

Временските прилики во следните денови ќе бидат под влијание на воздушни струења од северен правец. Ветерот ќе биде умерен, а повремено ќе засилува, особено в недела и во понеделник кога долж Повардарието ќе надминува брзина од 40 километри на час.

Промена на циркулацијата на воздухот се очекува од вторник, кога ветерот ќе го смени правецот во југозападен, задржувајќи ги високите дневни температури.