Огромно мнозинство Американци поддржува воведување нови државни правила за работата на социјалните мрежи, вклучително и задолжителна верификација на возраста за да се спречи пристапот на помладите деца, покажуваат резултатите од новата анкета на Ројтерс и Ипсос. Речиси две третини од граѓаните бараат построг надзор, додека 85 проценти од анкетираните сметаат дека платформите предизвикуваат зависност кај најмладата популација.
Анкетата спроведена меѓу 4.505 возрасни лица во САД покажува редок консензус меѓу гласачите на двете најголеми партии. За поголема регулација се изјасниле 71 процент од Демократите и 62 проценти од Републиканците, додека поддршката кај независните гласачи е нешто пониска поради нивната неодлучност.
Предлогот за задолжителна верификација на возраста за сите корисници под 16 години доби поддршка од 66 проценти од испитаниците. Интересно е што тука предводници се гласачите на Републиканската партија со 74 проценти поддршка, во споредба со 69 проценти кај Демократите. Граѓаните сè почесто истакнуваат дека државната интервенција е неопходна бидејќи контролата на родителите не дава посакувани резултати.
Резултатите од истражувањето доаѓаат во момент кога технолошките гиганти како Мета и Јутјуб се соочуваат со сериозни правни последици. Во државата Њу Мексико, судот веќе и наложи на Мета да плати 567 милиони долари во фондот за ментално здравје на тинејџерите и да ги промени механизмите на работа.
Сојузните држави веќе усвојуваат сопствени закони за заштита на малолетниците, но технолошкото лоби, предводено од организацијата Нетчоис, поднесе тужби за блокирање на овие мерки. Тие тврдат дека задолжителната верификација на возраста ја прекршува уставната заштита на слободата на говорот. Мета, од друга страна, се соочува со потенцијални казни од дури 1,4 трилиони долари доколку ги изгуби претстојните процеси.
Иако 70 проценти од Американците изјавуваат дека времето поминато на социјалните мрежи за нив е забавно, мнозинството е свесно за негативните последици врз децата. Дури 85 проценти сметаат дека платформите создаваат зависност, а исто толку посочуваат дека тие штетат на психичкото здравје на младите.
Американскиот Конгрес сè уште нема изгласано сојузен закон кој сеопфатно би ги заштитил децата на интернет. Додека законодавците дебатираат за рамката, 52 проценти од возрасните признаваат дека самите поминуваат премногу време на апликациите секој ден, што укажува дека проблемот го опфаќа целото општество.
